١٠ دروس فتنس تعلمتها في ٢٠٢٤

حقق جسم الأحلام بشكل أسرع

سلامات يا أصحاب

2024 كانت سنة عجيبة ومليانة أحداث لا تصدق

حبيت أني شارك شيئ مختلف برسالة اليوم

واحكي عن عشر دروس تعلمتها السنة يللي مضت وممكن تستفيد منها لو طبقتها بعام 2025 لتشوف أكبر تغيير على شكل جسمك وصحتك

ما بدعي أني أكثر شخص خبرة على وجه الأرض, بس عندي حب وإدمان للتعلم بشكل مستمر ومشاركة كل شيئ بتعلمه مع الناس يللي بحبهم وبهتم لأمرهم

هي الدروس الأهم يلي تعلمتها بعام 2024:

1. نبالغ بقدرتنا على الإنجاز خلال فترة قصيرة ونقلل من قدرتنا على تحقيق تقدم خلال سنة

ببداية 2024 كنت بـأسوء مستوى وشكل جسم من سنوات طويلة

ضغوطات بالعمل والبزنس وبحياتي الخاصة حولت شكلي إلى بالون مليئ بالدهون والتوتر المترافق مع الوزن الزايد كان حمل ثقيل

بس هالمرة ما حددت هدف قصير الأمد أو خبرت نفسي اني رح اخسر 10 كغ دهون خلال شهر أو اثنين , وإنما هدفي اني وصل لنسبة دهون أقل من 8٪ خلال سنة كاملة !

النتيجة؟

وصلت لأقل نسبة دهون بحياتي بدون حرمان أو تجويع وأنا عم استمتع بنمط حياة متوازن

وبنيت ثقة بنفسي وطريقة عندي إيمان بقدرتي على الاستمرار عليها لبقية حياتي وحافظ على النتيجة بشكل دائم

بالنهاية شو الفائدة من خسارة الوزن لو ما رح تحافظ على النتيجة, ما في داعي للاستعجال أو محاولة تحقيق هدفك خلال أسابيع قليلة

2. أهم إنجاز هو الاستمرارية

وجبة واحدة خارج الدايت واليوم يتحول ليومين وثلاثة ..

الهدف هو ليس جلد ومعاقبة نفسك وإنما العودة بأقرب وقت للسيستم يلي بنيته لنفسك

لو ما قدرت تلتزم بالتمرين أو كنت مشغول كل يلي محتاج تعلمه هو انك ترجع بأقرب وقت للجيم

لو بتظن ان الاستمرارية ما بتضمن نجاحك, الشيئ الأكيد ان بدون استمرارية من المستحيل النجاح بتحقيق أي هدف بالبزنس , فتنس أو بالحياة

مثال مشهور: لو عم تحاول أنك تقطع حجر كبير, رح تكون محتاج انك تضرب الحجر ١٠٠ مرة بالمطرقة بدون ما يظهر الحجر الضخم أي أثر أو فرق , وفجأة لما تضرب 101 مرة الحجر بينقسم لنصفين

ونفس المثال شفته بحياتي

خمس سنوات من الوحدة انتهت بعلاقة زواج سعيدة

فشل مرة بعد مرة بالبزنس, لحد ما بدأت شوف أول $

وحتى بالجيم أول 5 سنوات وأنا بحالة عدم رضا عن شكل جسمي , لحد ما اكتشفت السر وقدرت حقق جسم منحوت لبقية حياتي

النجاح هو محصلة القرارات الصغيرة والتضحيات والالتزام على فترات زمنية طويلة قبل ما تحصد ثمار تعبك

والمشوار بيبدأ بأخذ قرار الالتزام و كفة الميزان رح تتحرك لصالحك

3 عدّل الدايت حسب معدل تعرضك لأشعة الشمس

أشعة الشمس بتتحكم بشهيتك وحساسية جسمك للإنسولين

والطريقة يللي جسمك بيتعامل مع السكر والنشويات يلي بتستهلكها (لو رح يتم استخدامها ضمن العضلات أو تخزينها على شكل دهون )

التعرض لأشعة الشمس وخاصة ببداية اليوم, ممكن يغير من الطريقة يلي جسمك بيتعامل فيها مع الدهون من خلال:

• انكماش الخلايا الدهنية ضمن الجلد
  

• رفع من معدل الاستقلاب في الجسم Metabolism و زيادة في إفراز فيتامين دال بالجسم “البعض بيعتبره هرمون بيفرزه الجلد“
  

• مهم للتحكم بالشهية من خلال هرمون الجوع والشبع Leptin , Ghrelin
  

• ضبط الساعة البيولوجية بالجسم Circadian Rhythms وبيحسن من جودة النوم

لو أنت بتعيش ببلد الشمس فيه نادرة وقليلة لفترات طويلة بالشتوية مثل أوربا على سبيل المثال, يفضل تأخر الوجبة الأولى لوقت متأخر من اليوم وتجنب أكل كميات كبيرة من الكاربوهيدرات

والعكس صحيح

بفصول الصيف بتقدر تفطر بوقت مبكر وتاكل كميات أكبر من النشويات

حاول التعرض للشمس ببداية اليوم بأقرب وقت بتقدر تكون فيه برا البيت , وكمان بنهاية الوقت وقت الغروب

4. يمكن ان تكون غير راضي عن شكل جسمك ولكن لا تستطيع تحمل تكلفة تجاهل الأمر

لو كل شيئ بتشعر فيه هو العار وعدم الرضا وحتى الكراهية لنفسك وجسمك, لن يكون أفضل دافع للتغير

بس لما هذا الشعور يكون جزء من هويتك والطريقة يللي بتشوف فيها نفسك, رح يتحول لسم قاتل وعلاقة سلبية بتمنعك من تحقيق ذاتك وبتمنعك من التغيير

المشاعر السلبية ممكن تكون الدافع لبدء المشوار , بس على المدى البعيد المشاعر إيجابية ممكن تكون الوقود الأفضل للاستمرارية والاستمتاع بالمشوار وهالشي من المستحيل بدون امتلاكك للوعي الكافي والمعلومات لتخلق تغيّر

لتحقيق جسم صحي ومنحوت لازم تتعلم كيف تحب جسمك ونفسك وتعرف ان كل إنسان بدأ من مكان ما كان غير راضي فيه

5. أفضل نوع كارديو هو النوع يلي بتحبه

لسنوات وأنا بظن ان لازم انهك نفسي بالكارديو او من المستحيل تحقيق جسم منحوت, لحد ما تعلمت الدرس بالطريقة الصعبة

إصابات , إنهاك , تعب وشديد

أثر بشكل سلبي على مستويات هرمونات جسمي مثل التستوستيرون لما التوتر يكون بمستوى عالي (معظم المكملات لرفع هرمون الذكورة تعتمد على آلية تقليل التوتر مثل Ashwagandha)

مع اني اعتمدت على جرعات عالية من pre-workout وكافيين ومع هيك وضعي كان مثل الزومبي أغلب الوقت وكرهت التمرين والجيم

في فرق كبير بين أنك تستمتع بالتمرين وأنك تحتاج لمعجزة وقوة إرادة عجيبة لتقدر تعمل أي نشاط بدني

لو انت مثلي بتكره “الركض“ ما لازم تجبر نفسك أنك تعمل شيئ بتكرهه لأن الاستمرارية رح تكون مستحيلة

لنفس السبب نوع الكارديو الأفضل هو يلي بتقدر تستمتع فيه

بالنسبة لإلي المشي 10,000 خطوة يومياً عادة سهلة وبقدر بنفس الوقت اعمل تمارين تنفس أو اسمع لبودكاست أو كتاب صوتي واستفيد من وقتي

6. تحتاج لمجتمع وأصحاب عقلية مشابهة

يوجد ٣ أنواع من الالتزام:

• الالتزام الذاتي

• الالتزام مع مدرب

• الالتزام ضمن مجموعة

يفضل انك تمتلك الأنواع الثلاثة السابقة سوياً لتحقق أفضل نتيجة وتضمن أنك على الطريق الصحيح

بالنهاية نحنا محصلة الخمس أشخاص المحيطين فينا

هي السنة بدأت شيئ مختلف, وضفت خاصية التواصل بشكل مباشر من خلال الأكاديمية للاشتراك 👇🏻

7. ما يمكن تتبعه يمكن تحسينه

هدفك تخسر وزن؟ تتبع وزنك بشكل يومي

هدفك تخسر الدهون حولين منطقة البطن؟ تتبع مقاسات خصرك

هدفك تبني عضلات وتكون أقوى؟ تتبع شدة تمرينك

هدفك تحسن من جودة أكلك؟ تتبع جودة الطعام والعناصر الغذائية الموجودة جواه Micronutrients

عقلنا البشري ممكن يسعى للتحسين لما يكون عنا معلومات كافية وقدرة على تتبع تقدمنا على شكل أرقام

ما لازم التتبع يكون هوس مرضي بدون فهم للصورة الكبيرة

على سبيل المثال معظم الناس بتقلل من تقدير كمية السعرات الحرارية المستهلكة على مدار اليوم و رح يحسن من علاقتك مع الأكل بشكل جداً كبير لو قدرت تتبع السعرات الحرارية الموجودة بأكلك لفترة مؤقتة

لتكوّن فهم ومعرفة عن كمية الطعام “السعرات يلي جسمك بيحتاجها لتخسر أو تكسب وزن“

8. ليست كل السعرات الحرارية متساوية

التتبع الأعمى للسعرات الحرارية ممكن يخليك توقع بفخ شائع

لما تحاول تحديد جودة طعامك وتتبع سعراتك الحرارية, في شيئ أهم من مجرد رقم وعدد

يللي هو جودة السعرات الحرارية يللي عم تدخل لجسمك value per calorie (VPC)

يللي هي المغذيات المصغرة أو Micronutrients مثل الأملاح, المعادن الفيتامينات

السعرات بحد ذاتها هي طريقة بدائية لتتبع كمية الطعام ليس أكثر ومن الممتاز فهم الآلية

لما تستهلك أطعمة جودتها قليلة رح تكون مثل شخص عم يشتري من موقع صيني, صحيح ممكن تشتري عدد كبير من الملابس ولكن جودتها متدنية

ونفس الشيئ بالطعام: الخيار لإلك دائماً بين العدد أو الجودة

الخيار الأذكى والأكثر استدامة هو اختيار أطعمة عالية الجودة مثل: اللحوم, بيض, بروكلي

أو أي خيارات ذو جودة عالية و رح تضمن شبعك وتغذي جسمك بالعناصر الغذائية يللي رح تدعم تقدمك على مدار المشوار

حكيت سابقاً بالتفصيل عن الموضوع ↓

9. مشاعرك السلبية ليست صادقة دائماً

كم مرة حسيت فيها انك ما بتمتلك الطاقة الكافية لحتى تتمرن وبعدها جبرت نفسك مع فنجان اسبريسو أو مشروب طاقة وكان التمرين بعدها جبار وغير من مودك ومستوى طاقتك؟

قدرتك أنك تلتزم بهي الأيام هي يللي تعمل فرق على المدى البعيد وبتشكل الفرق بين النجاح والفشل بتحقيق أي هدف جسدي, مادي أو أي صعيد تاني بحياتك

عقلك بيخدعك ليزيد من فرصتك بالنجاة

وبالأوقات يللي بتحس فيها أن بطاريتك فارغة, انت باغلب الأحوال بتمتلك قوة جبارة جواك, جسمنا بيحاول يوفرها ليحميك مو اكثر ولأننا بطبيعتنا كبشر منميل للخيارات الأسهل والأكثر راحة

أكيد في أوقات لازم تسمع فيها لجسمك , ولكن تذكر أنه في معظم الأوقات لا تستطيع الاعتماد على مشاعرك بتحديد لو رح تقوم بالمهام المطلوبة منك لتحقيق هدف مثل جسم صحي منحوت أو تحقيق ذاتك في الحياة

10. حدد ماذا تريد في الحياة

لو رح تضيع ضمن السوشال ميديا ممكن تغرق ببحر من النصائح لناس بتخبرك كيف لازم يكون شكلك, أو كيف لازم تعيش حياتك

عانيت من هالشيئ شخصياً مثلي مثل ملايين من البشر,

ضيعت وقتي وطاقتي لسنوات وأنا عم اسمع نصائح مختلفة على السوشال ميديا لمدربين ولاعبين كمال أجسام “بتستخدم جرعات هائلة من المنشطات ومحسنات الأداء“ وظن ان لازم ضخّم جسمي بشكل غير طبيعي ليكون شكلي مقبول بالجيم

وما تعلمت الدرس إلا بعد سنوات طويلة لما لقيت نفسي عم اسعى لتحقيق هدف ما اخترته لنفسي

الطريقة الأكثر استدامة هو لما تختار أهداف إلها معنى بالنسبة لإك وتآمن بنفسك وبقدرتك على تحقيقها

مثل إطالة سنوات عمرك longevity وترفع من جودة حياتك وتستمتع بمستويات طاقة الشباب لآخر يوم بحياتك

والاهم من كل ما سبق انك تستمع بالمشوار

بدون القدرة على الاستمتاع بالمشوار من المستحيل الاستمرار

أسوء شيئ ممكن تعمله انك تسعى لتسلق قمّة “هدف“ لتوصل للقمة وتلاقي نفسك على الجبل الخطأ

جسم منحوت هو أكبر من الشكل الظاهري

عندي إيمان ان التمرين في الجيم لتحقيق جسم منحوت هو أكبر بكثير من مجرد شكل ظاهري وإنما رحلة من تطوير الذات على صعيد عقلية تفكيرك وحتى على المستوى الروحاني Spiritual

مشوارك لتحقيق ذاتك على كل أصعدة حياتك سواء كانت تحقيق دخل أكبر, إيجاد حب حياتك أو تحقيق جسم صحي وحياة ذو معنى بيبدأ من المنزل يلي بتعيش فيه لآخر لحظة بعمرك “جسمك“ يللي ممكن يكون مثل سيارة فيراري بقوة 1000 حصان , أو جسد منهك تعبان غير قادر على حمل نفسه لينهار بعد الأربعين ويكون عرضة لكل الأمراض والعلل الجسدية والنفسية

بتمنى انك تاخد الدروس يللي شاركتها وتطبقها بعام 2025 لأن عندي إيمان بقدرة أي إنسان على تحقيق أي هدف لو امتلك الأدوات الكافية “مجرد وجودك هون وقراءتك لرسائلي رح يحطك المقدمة ومع النخبة 1% من ناحية المعرفة“

وبيبقى العائق الوحيد بينك وبين تحقيق جسم منحوت هو امتلاكك للإرادة الكافية وأخذ هي النصائح على محمل الجد وأخذ أفعال بشكل مستمر

وبالنهاية لو عندك أي اسئلة/ اقتراحات شاركها معي بالتعليقات , برد على الجميع بدون استثناء

متحمس لرافقك بالمشوار وشوفك عم تحقق اكبر تغيير بحياتك

محمد سليك

---

في أي وقت تشعر أنك جاهز لبدء التدريب معي:

تعلم الطريقة الأفضل لبناء جسم هوليودي منحوت خلال 120 يوم

سيكون لديك وصول:

• دليل كامل خطوة بخطوة لبناء جسم منحوت, نفس الطريقة التي يتبعها مشاهير هوليود 🏋🏻

• محتوى حصري و دروس إسبوعية 🎥

• تواصل مباشر للإجابة على استفساراتك 💬

• مكالمات شهرية للإجابة على اسئلتك ☎️